Leygardagin 26.07.08 fór felagið Gjómaður aftur til verka. Hetta triðja átak felagsins var at endurreisa Ólastovugróthúsið í Lágunum. Sólin skein av heiðum himni við 24 hitastigum - hoyggingini í hásæti - brúðarvígslu í bygdini, so vánirnar fyri væl mannaðum gróthúsaliði vóru ikki tær bestu. Havandi umstøðurnar í huga má kortini sigast, at undirtøkan var góð, arbeiðið gekst avbera skjótt og væl, og hugnin var í hásæti allan samlan dagin.

Seinnapartin hósdagin 31.01.08 brast hann á við ódnarstormi og kavaroki av landnyrðingi norði um alt landið. Størri og smærri skaðar vóru allastaðni kring oyggjarnar, men teir størstu skaðarnir vóru tó í Skálavík og Norðragøtu. Landnyrðingur er ringasta brimætt við Gjógv, og hesa ódnina fer bygdarfólkið ikki at gloyma. Tað ljósa av degnum lá snøgt sagt øll bygdin undir í sjó- og kavaroki, so ilt var at meta um, hvussu stórur partur av avfallinum var kavi ella sjórok. Ikki var hugsingur um at fara út fyri dyr, og ikki hevði kortini nyttað at tikið myndir, tí alt stóð í eini glaðu.